153

طویل عرصہ کے بعد اس ہفتے جامع مسجد سرینگر میں نماز جمعہ ادا ہو گی

طویل عرصہ کے بعد اس ہفتے جامع مسجد سرینگر میں نماز جمعہ ادا کرنے کی اجازت مل سکتی ہے جس کو مد نظر رکھتے ہوئے انجمن اوقاف کے زیر اہتمام باقاعدہ مسجد پاک کی صفائی اور ستھرائی کا عمل انجام دیا گیا اور اس مہم میں انجمن کے ملازمین اور عملہ نے بڑھ چڑھ کر حصہ لیا۔سی این آئی کے مطابق تاریخی جامع مسجد سرینگر میں اس جمعہ کو نماز جمعہ ادا کی جائے گی ۔ اس ضمن میں انجمن اوقاف جامع مسجد سرینگر نے اپنے ایک بیان میں کہا ہے کہ مسلسل نامساعد حالات ، COVID-19 کی قہر انگیز لہر اور لاک ڈاﺅن کے باعث مرکزی جامع مسجد سرینگر جو نماز اور عبادات کیلئے ایک طویل عرصے سے بند تھی آج انجمن اوقاف کے زیر اہتمام باقاعدہ مسجد پاک کی صفائی اور ستھرائی کا عمل انجام دیا گیا اور اس مہم میں انجمن کے ملازمین اور عملہ نے بڑھ چڑھ کر حصہ لیا۔بیان میں کہا گیا اب جبکہ وائرس کی لہر میں ٹھہراﺅ آگیا ہے اور جموں و کشمیر کی مرکزی مساجد، خانقاہوں، آستانوں اور امام باڑوں میں باضابطہ نماز جمعہ کا اہتمام کیا جارہا ہے۔ توقع ہے کہ آئندہ جمعتہ المبارک سے کشمیر کی سب سے بڑی عبادتگاہ مرکزی جامع مسجد سرینگر کو بھی نمازیوں اور زائرین کیلئے کھول دیا جائیگا تاہم بیان میں واضح کیا گیا کہ جمعتہ المبارک کی نماز اور پنچ وقتہ نمازوں کیلئے طبی ماہرین کی آرا اور گائیڈ لائن کے مد نظر بطور احتیاط کووڈ ایس او پیز کا پوری طرح سے خیال رکھا جائیگا اور نمازیوں کو اس کا پوری طرح سے پابند بنایا جائیگا۔

اس خبر پر اپنی رائے کا اظہار کریں

اپنا تبصرہ بھیجیں