سکولوں پر قومی پرچم لہرانے اور ملازمین کو حاضر رہنے کا خصوصی حکم
سرکار نے جموں وکشمیر کے تمام سرکاری تعلیمی اداروں کو 15 اگست کی یوم آزادی تقریب سکولوں میں منانے کی ہدایت دیتے ہوئے قومی جھنڈا لہرانے کیلئے کہا ہے جبکہ سرکاری ملازمین سے کہا گیا ہے کہ وہ ضلع صدر مقامات پر منعقد ہونے والی تقریبات میں اپنی شرکت کو یقینی بنائیں۔ ایس این ایس کے مطابق جموں وکشمیر کے محکمہ تعلیم نے پرائمری سطح سے لیکر یونیورسٹی سطح تک تمام سرکاری سکولوں، کالجوں اور یونیورسٹیوں میں 15 اگست کی تقریبات منانے کے احکامات جاری کئے ہیں۔ ضلع سطح پر چیف ایجوکیشن افسران نے ہائی سکولوں، ہائر سکینڈریوں اور زونل ایجوکیشن افسروں کے تحت آنے والے سکولوں کے نام ایک حکمنامہ جاری کیا ہے جس میں تمام اساتذہ کو یوم آزادی کی تقریب پر سکولوں میں حاضر رہنے، ترنگالہرانے اور تقریبات منانے کیلئے کہا گیا ہے۔ سرکاری سکولوں پر ترنگا لہرانے کے علاوہ قومی جھنڈے کے پس منظر والے سائن بورڈ بھی نصب کرنے کا حکم جاری کیا گیا ہے جس کیلئے سماگرا سکیم کے تحت رقومات واگذار کئے جارہے ہیں۔ تما م سکولوں کے سربراہان کو ترنگا لہرانا ہوگا اور اس کی ویڈیو متعلقہ چیف ایجوکیشن افسران کی لنک پر اپلوڈ کرنالازمی قرار دیا گیا ہے۔اس کے علاوہ سرکاری ملازمین کو ہدایت دی گئی ہے کہ وہ 15اگست کی تقریبات میں شرکت کیلئے ضلع صدر مقامات پر پہنچیں جبکہ پہلو تہی کرنے والوں کے خلاف کاروائی کرنے کا فیصلہ لیا گیا ہے۔
